काठमाडौं । विद्युतीय सवारीसाधनमा कर वृद्धि हुने सरकारी तयारीबारे गोप्य सूचना व्यवसायीसम्म कसरी पुग्यो भन्ने प्रश्न अहिले बीवाईडीसँग सम्बन्धित कर तथा भन्सार प्रकरणको केन्द्रमा पुगेको छ। यही प्रकरणमा उत्तरी नाकाहरूमा लामो समयदेखि सक्रिय क्यारिङ व्यवसायी उद्धव राउतको नाम पनि विभिन्न स्रोतहरूबाट चर्चामा आउन थालेको छ।
बिज्ञापन
बीवाईडी ब्रान्डका सयौं गाडी बजेट सार्वजनिक हुनुअघि नै मुस्ताङ र रसुवा भन्सार कार्यालयमार्फत अस्वाभाविक रूपमा इन्ट्री भएको, केही गाडी भौतिक रूपमा नाकामा नपुग्दै जाँचपास प्रक्रिया अघि बढाइएको तथा त्यससँगै भन्सार कर्मचारीहरू अनुसन्धानको दायरामा तानिएपछि अनुसन्धानकर्ताहरूले विभिन्न तहका व्यक्तिहरूको भूमिका अध्ययन गरिरहेका छन्।
बिज्ञापन
उच्च स्रोतहरूका अनुसार उत्तरी नाकामा सञ्चालन हुने क्यारिङ तथा भन्सारसम्बन्धी गतिविधिमा उद्धव राउत प्रभावशाली व्यक्तिका रूपमा चिनिन्छन्। नाकामा आउने विभिन्न मालवस्तु तथा सवारीसाधनको व्यवस्थापन, कागजी प्रक्रिया र ढुवानी समन्वयमा उनको सक्रिय भूमिका रहने गरेको बताइन्छ। बीवाईडीसँग सम्बन्धित पछिल्लो प्रकरणमा पनि नाकास्तरमा हुने गतिविधिहरूमा उनको संलग्नता थियो वा थिएन भन्ने विषयबारे केही निकायहरूले अनौपचारिक रूपमा जानकारी संकलन गरिरहेको स्रोतहरूको दाबी छ।
स्रोतहरूका अनुसार राउतले उत्तरी नाकामा विभिन्न व्यवसायिक समूहहरूको काम व्यवस्थापन गर्दै आएका छन्। तर उनीमाथि लगाइएका आरोपहरूबारे हालसम्म कुनै सरकारी निकायले आधिकारिक निष्कर्ष सार्वजनिक गरेको छैन। उनीमाथि केही स्रोतहरूले भन्सार प्रशासनसँग निकट सम्बन्ध राखेर विभिन्न व्यवसायिक गतिविधि सञ्चालन गर्ने गरेको आरोप लगाउने गरेका छन्।
बिज्ञापन
बीवाईडी प्रकरणमा मुख्य प्रश्न भने अझै पनि उही छ— बजेटमार्फत विद्युतीय सवारीसाधनमा कर वृद्धि हुने गोप्य सूचना व्यवसायीसम्म कसरी पुग्यो ? किनभने जेठ १५ गते बजेट सार्वजनिक हुनुअघि मुस्ताङ भन्सार कार्यालयबाट दुई दिनमै ६४९ वटा र रसुवा भन्सार कार्यालयबाट ११८ वटा बीवाईडी गाडी इन्ट्री भएको तथ्यले सामान्य व्यापारिक प्रक्रियाभन्दा बाहिरको अवस्था देखाएको छ।
अनुसन्धानमा संलग्न स्रोतहरूका अनुसार केही गाडी भौतिक रूपमा नाकामा नपुग्दै प्रज्ञापनपत्र दर्ता गरिएको तथा कर बुझाइएको विषयले अनुसन्धानलाई अझ गम्भीर बनाएको छ। त्यसपछि रसुवा भन्सार कार्यालयका प्रमुख भन्सार अधिकृत तुलसीप्रसाद भट्टराईसहित ६ कर्मचारीलाई विभागमा तानेर अनुसन्धान अघि बढाइएको छ भने मुस्ताङ भन्सार कार्यालयका गतिविधिहरू पनि अध्ययनको दायरामा ल्याइएको छ।
यसअघि पनि बीवाईडीको नेपालस्थित आधिकारिक बिक्रेता साइमेक्स इंक प्रालिमाथि उच्च क्षमताका विद्युतीय सवारीसाधनलाई कम क्षमताको देखाएर भन्सार तथा अन्तःशुल्कमा छुट लिएको आरोपमा राजस्व अनुसन्धान विभाग र सीआईबीले अनुसन्धान गरिरहेका छन्। सो अनुसन्धान निष्कर्षतर्फ उन्मुख भइरहेका बेला गाडी नआउँदै जाँचपास गरिएको भनिएको नयाँ विवाद सार्वजनिक भएपछि प्रकरणले नयाँ मोड लिएको छ।
अनुसन्धान अगाडि बढ्दै जाँदा केवल व्यवसायी र भन्सार कर्मचारीहरूको भूमिका मात्र नभई नाकास्तरमा सक्रिय क्यारिङ एजेन्ट, ढुवानी समन्वयकर्ता तथा अन्य मध्यस्थकर्ताहरूको भूमिकासमेत परीक्षण हुन सक्ने स्रोतहरूको भनाइ छ। यद्यपि हालसम्म कुनै पनि निकायले उद्धव राउत वा अन्य व्यक्तिविरुद्ध औपचारिक आरोप वा अभियोग दर्ता गरेको छैन।
यस कारण प्रकरणको अन्तिम निष्कर्ष नआउँदासम्म उठेका आरोपहरू अनुसन्धानकै विषयका रूपमा रहेका छन्। तर बजेटअघि भएको अस्वाभाविक गाडी इन्ट्री, भन्सार जाँचपास प्रक्रिया र सम्भावित सूचना चुहावटको रहस्य खुल्दै जाँदा उत्तरी नाकामा सक्रिय प्रभावशाली पात्रहरूको भूमिकामाथि पनि प्रश्न उठ्न थालेको छ।
बीवाईडीको कामहरू आफूले गर्दै आएको उनले स्वीकार गरेका छन्। तर कैफियत नभएको बताए ।
कर्मचारी प्रेसको निरन्तर खुलासापछि मन्त्रालयको छानबिन टोली मुस्ताङमा
बजेटअघि कर हेरफेरको सूचना चुहिएको आशंका : सशस्त्र प्रहरीद्वारा ७७५ बीवाईडी गाडी नियन्त्रणमा
तस्करीको हब बन्दै कोरला भन्सार,अनुसन्धानको राडारमा दर्जनौं कर्मचारी
